तामाङ जातिको सर्वाधिक बाहुल्यता रहेको यो जिल्ला च्योबाङ अर्थात् चेपाङ (प्रजा) जातिको विशेष वासस्थान रहेको छ भने यस जिल्लाको हाँडिखोला गाविसमा बसोवास गर्दै आएका अति पिछडिएको देशकै एकमात्र वनकरिया जातिको बसोवासक्षेत्र र तिनीहरूको सांस्कृतिक, मौलिक पहिचानको लागि पनि प्रसिद्ध छ । त्यसैगरी अल्पसङ्ख्यक दनुवार, माझी, पहरी, थामी आदि जनजातिको पनि बसोबास रहेको छ । डाँडाखर्क गाविसको बैकुण्ठमा तामाङ जातिद्वारा नाचिने घाटु नृत्य, पालुङ उपत्यकामा नेवार समुदायको बाह्र वर्षे नृत्य र इन्द्रायणी नृत्य अत्यन्त लोकप्रिय मानिन्छन् । जिल्लाको पूर्वी क्षेत्र फापरबारी गाविसको झुरझुरेमा दनुवार राजाको दरवार थियो भनिन्छ । त्यसैगरी फापरवारी–७ को गोल्मी डाँडामा गोल्मे राजाको दरवार भएको र बेतीनीमा पनि दरवारको अवशेषहरू पाइएको स्थानीयवासी बताउँछन् ।
